بمناسبة موسم التزاوج اللي شغال بقاله كتير رغم كل اللي بيحصل في البلد , عادي وماله نفرح , بس الموضوع ده في كلام كتيرقوي وهتبتدي بحاجة مهمة قوي و هأتكلم عن الجوازات اللي بتفركش عشان مشاكل عجيبة أنا عندي رأئي في الموضوع ده
أنا عاوزة أفهم إيه حكاية نجيب حماقي
ودينا في الفرح دي ؟
مين بيحب حماقي أصلا؟ وليه ندفع فلوس على راقصة ممكن نشوفها في التلفزيون ببلاش يعني !!
ليه مينفعش نجيب فرق مزيكا من أصحابنا أو حد صوته لذيذ يلعب مزيكا؟ لو ده جنان اتنيل اتجنن !
وليه لازم نجيب الفستان من بره؟ فستان هيتلبس يوم واحد بس يدفع فيه كل ده؟ وعلى فكرة الفستان لما يتفصل بيكون مظبوط أكتر عشان معمول على الجسم بظبط ! وليه الفرح بيكون في ناس كتير وصوتهم عالي في مكان مبالغ في تمنه ؟ هو ده الإحتفال؟ هي دي الفرحة؟ هو مش المفروض الفرحة تكون مع الناس اللي احنا بنحبهم؟ ولو احنا بنحبهم وهم بيحبونا مش هيتكلموا عن اد إيه البوفيه كان حلو أو إن الراقصة كانت جامدة ! الناس اللي بيحبونا دول هيفرحو معانا مش هيستنوا على غلطة عشان ينمو علينا
وليه لازم نحجز قاعة في فندق كبير وغالي ؟ عشان الشكل؟ هو الفندق ده هيفرق في إيه ؟ هم كراسي وترابيزت وكوشة ! مش أحسن الفلوس دي تروح ل شهر العسل أو للشقة ؟
عاوزين نفرح؟ ماشي ! بس على فكرة عمر الفلوس مابتعمل فرحة , كل ده مجرد شكل ومظاهر
كلام المهر بقي الخزعبلي وال شبكة الي مفيش منها اتنين الليي هي غالبا بتكون فوق قدرة العريس! ليه يعني؟ عشان "يثبت" إنك غالية عنده؟ إنتي مصدقة نفسك؟ هتتجوزي واحد مستنية يثبت ليكي غلاوتك عنده بحاجة مادية ؟ هو لو قرر إنه عاوزة يصحى كل يوم على وشك يبقى أكيد عاوز يقضي حياته معاكي يبقى أكيد أكيد إنتي غالية عنده ! على فكرة هو عنده اوبشن إنه مايتجوزكيش !أما بنزبة لاهلك لو مش مصدقين ده و محتاجين دلالة مادية يبقى هم مش بيثقوا فيكي أو بيعاملوكي على أساس إنك استثمار حطو في تعليمك وتربيتك فلوس ومستنين الغلبان اللي هيتجوزك يشيل الليلة !
أما بالنسبة للناس اللي هاتاكل وشك أو وشه أو وش اهلك ! مبدئيا يع أوي ! ثانيا مش هما دول الناس اللي كانوا عاوزينك تدخلي طب؟ وتتحجبي وأنتي في أولى اعدادي؟ وتتخطبي أول ماتتخرجي؟ الناس دي مش مهم عندها إنك تكوني سعيدة! هما ناس عندهم فراغ وعاوزين يتفرجوا على ناس تانيين جوه برواز عشان يتكلموا عليهم برضو! لو إنتي نفسك تدخلي في الدوامة دي طول عمرك ! يبقى إنتي بتضحي بحاجات كتير قوي !
نيجي بقي لل تقيلة الشقة وال فرش !!
لو النجفة بـتلات الاف جنيه مش هتدي نور أكتر ولو الكنبة من باريس مش هتعمل حاجة أكتر من إنكم تقعدوا عليها وأكيد اللوحة اللي بـعشر الاف جنيه في الصالون مش هتفرق مع أي حد غير طنط دولات اللي هي هتموت أصلا كمان كام سنة !! يبقى خليها تشتري اللوحة وتدفنها معاها اوقع !
ببساطة هاتوا اللي أنتم محتاجينو ! حاجة شفتوها وحبيتوها, أنتم هتعيشوا في بيتكم أكتر من الضيوف على فكرة !!
مفيش حاجة اسمها اهلك وأهله يتحكموا في تفاصيل حياتكم , لأن في الآخر في باب بيتقفل على شخصين هم إنتي وهو بس !مفيش حد تالت معاكم عشان ينبهر بالمطبخ أو يحقد على السجاد أو يتكلم عن النيش !! اللي بالمناسبة حاجة ملهاش لازمة بتتملي حاجات تانيا ملهاش لازمة برضو!
وأفتكر إنكم مش هتتناقشوا في الاصناف اللي كانت في البوفيه ولا أغنية حماقي على الفرست دانس! المغني الوحيد اللي ممكن تتكلموا عنه هو المرحوم فرانك سيناترا لو جيه الفرح !
من الآخر كده الجواز مش ببلاش بس برضه مش بالبزخ الرهيب ده! خفي تعومي يا حلوة !
اهلك وأهله راسيهم على الحوار وخليهم يظبطوا من الأول ولازم يفهمو إن دي حياتكم مش حياتهم ولا حياة طنط كيكي ولا أنكل فرحات!
وكفاية بقا كده عشان اتخنقت !
