أنا ياءست فعلا .. موضوع وحش قوي إن كل ماأنزل من بيتي في ناس بيتضايقني ... يعني تخيلوا كده إن كل ماتنزل من بيتك أي حد في الشارع شايفك مباح ...الفاظ بقا أو لمس .. حتى في الشغل ... ثقتنا في نفسنا كا بنات في خطر ... أنا في ساعات بأحس إني مكروهه لمجرد إني بنت ... أصل ليه الخلق كله شايفني مباحة ليه فعلا ؟؟؟
مع إني زهقت من الكلام في موضوع التحرش الجنسي ده , و"حركات التوعية" اللي بتكون على الفيسبوك والجامعات الخاصة ... آه فعلا هي دي الشريحة الخطيرة اللي محتاجة توعية عشان التحرش !
والفيديوهات اللي على يوتيوب اللي منها واحد بقولك من فضلك ماتتحرش... حست إني أحمد حلمي في فيلم صايع بحر "ماتقوم تعزمو على حجرين أحسن يا عم"
ايا كان اللي عمل الفيديو ده ... شكرا على نيتك الطيبة .. لكن المتحرش اللي مش هيتفرج على الفيديو على يوتيوب لإنه غالبا بيتفرج على اوكة واورتجا ده لو عنده نت أصلا ... سعادته مجاش سأل ممكن من فضلك اتحرش بيكي قبل مايعمل كده .. مش طبيعي اطلب منه بأدب على الاقل مش بعد ماالطلاب بأدب منفعش العشر سنين اللي فاتوا... مع احترامي الكامل لكل المجهود أنا مش متفالة بس جواية أمل بسيط لمبادرتكم .. يا سلام لو تنفع
أنا مش باكتب عشان أشوف طريقة عشان امنع التحرش أو اتريق على جهود الغير.. بس والنبي قبل ماتقرا متقولش إن الموضوع هيتحل بسهولة .. الموضوع لسة أصلا في حالة الإنكار عند معظم الشعب و كتير كمان في حالة التعايش ... مش عشان احنا شباب من طبقة عالية هنعيش دور أنا معرفش حد بيعاكس ودي ظاهرة هتختفي بالجهد الذاتي . ولو إنت من الناس اللي بتعيب على البنت ... إنت مصدق نفسك؟ آه؟ حسبي الله ونعم الوكيل
استعنا على الشقة بالله
لازم نتفق على إن الإنسان نتاج من البيئة اللي نشيء فيها ... كلنا بنطلع نشوف الثقافة اللي حوالينا إيه وبنكون شخصية وفكر وعقد
الثقافة بتتكون من كذا حاجة,التقاليد; في كمان العامل الأساسي هو التربية و طريقة التعامل في البيت والمدرسة والشارع أو
النادي.. الإعلام من برامج وأفلام, ومسلسلات وأغاني وأكيد كمان التوعية الدينية ...
الكلام ده بيولد مجموعة من القيم والمبادئ اللي الإنسان على اساسها بيتعامل في حياته بيها.
نشوف كده الإعلام ... قائد ثورة المتحرشين ومثل أعلى لشباب كتير وفتى أحلام نص بنات مصر مش عارفة إزّاي بصراحة تامر حسني ... اللي لامواخذة بيضرب البنات على بنطلوناتهـا وبيغني بيقول هي دي طيييي بة قلبك ... وقبليه الفنان عادل إمام اللي مفيش فيلم ومنمش فيه مع تلات اربع ستات الفيلم وعادي بقى يضرب على بنطلون ولا يبوس يعمل اللي هو عاوزه ... فيلم زي اوقات فراغ اللي بيجيب مشهد واحد بيضرب واحدة من شباك عربيته والناس بتصقفله على أساس إنه إنجاز
أي واحدة في أي فيلم هتقف لها عربية هتركب وش ... أي واحدة لابسة فستان سواريه المشهد البعده بتلاقيها بتبوس عادل إمام بدون أي علاقة ولا أي قصة حب ... الفيلم كان هيمشي عادي من غير التحرش والبوس والعلاقات دي لانها أصلا مش في سياق الدراما... عادي برضه ...حاجة بنضحك عليها... وبعدين ننزل تحت أكتر بقى أفلام السبكي .. دي اصلا مفيهاش نقاش ... وكمان عشان بصراحة مبتفرجش عليهم قوي فـمش هفتى ... أبسط حاجة لما يكون أشهَر أغنية في بلد "شرقية" "اسلامية" "متحفظة" هي هاتي بوسة يا بت ... بجد لا تعليق
تاني حاجة ... كل حاجة من المدرسة للشارع للبيت .. البنت بتمثل مواطن درجة تانية أو تالتة
.. الشتيمة ابن مرة أو تربية نسوان ... المدح راجل ابن راجل أو تربية رجالة
أي واحدة اجنبية أو لابسة مايوه أو حتى رايحة شرم يبقى ممكن تعمل معاها أي حاجة ... بس إنت حاول مش هتخسر
البنت المحترمة لازم تلبس طويل وواسع أو تتحجب ... معنديش اعتراض على فكرة بس على فكرة بقى حضرتك من سرتك لركبتك عورة يعني شورتات الكرة والرياضة لأ ..البنطلون السكيني لأ... بوكسرباين من تحت البنطلون لأ ... صورتك على البحر عريان من فوق لأ ... المايوه الغير شرعي لأ ... ده لو إنت بتتكلم في العورة وكلام ربنا ... لكن احنا اتربينا على ععادة حجب المراة و ليس ستر العورات يا ساده. على فكرة كمان الزنا ربنا بيحاسب عليه الولد والبنت مش بس البنت زي مجتمعنا هنا .. يعني أي شاب مش فيرجن قبل الجواز ده زنا والزنا من الكبائر على فكرة وربنا هيحسبك عليها لإن ده مش طيش شباب.
البنت هي اللي تنضف وتطبخ وهو يأكل.. هي اللي تروق وهو يوسخ ... هي تغسل وهي يلبس ... حتى لو امكن الأخ أو الاب يضرب الأخت أو الأم ... مجتمعنا مبرمج على إن الست مخلوق أقَل .. مخلوق لازم اضعف .. أقَل ذكاءا وحيلة وقوة
نيجي بقى للتحليل الخاص بيَّ ... البني آدم في بلدنا اتهزم .. انسانيا ... احنا كل حاجة في حياتنا بايظة ... الهوا ملوث .. الدنيا زحمة, الاقتصاد مش مزدهر ... الإنسان المصري بيتهان لمجرد وجوده ... من مدير معقد أو منظر قبيح لزبالة أو غلاء مستمر للاسعار
الحكومة أول حاجة بتهين الإنسان في مصر وتهزمو ... 30 سنة بنتسرق ونتكبت ... 30 سنة طبقة عايشة في مياة الكريمة والباقي مهزوم سواء على مستوى أحلام مش هتحصل عشان إنت في مصر أو حقوق بقت بتعتبر أحلام زي أكل وشرب ومعيشة وجواز وبعدين وجيش حط علينا شويه ودلوقتي الإخوان بيكملوا في ذل واهانة الإنسان المصري
ركزوا كده ... أنا إنسان متربي إن الست دي حاجة ضعيفة و أقل وبعدين أنا مهزوم ومتهان ... أنا أكيد هشوف اقرب حاجة أنا شايفها اضعف مني وهحسسها إني أحسن .. لاني متربي على كده
أنا راجل وسيد الرجال بس العالم كله مش معترف بكدة ... يبقى هي الضعيفة دي هاهزمها و ههناها عشان أحس إني أقوى ... وراجل عشان مينفعش أكون ضعيف في كل حاجة كده حتى الكائن اللي أنا متربي على أساس انه أقَل أصلا
بنسبه للناس اللي بتقولي اصله مش بيعرف يمسك نفسه والموضوع مش كبير كده الموضوع بسيط ... لأ
مثال لو في واحد بيشتغل جرسون في تماري الراجل ده بيشوف ناس شبه عريانة ستات ورجالة ومش بيفتح بقه .. نفس الراجل ممكن يكون ساكن في أرض اللوا مثلا بيشوف واحدة لابسة عباية في الشارع بيعاكسها ويقولك أصل العبآية ضيقة وأنا شاب وكده
الموضوع بسيط .. الراجل ده لو عاكس واحدة من اللي جوه مكان أكل عيشه هايترفد ومش بعيد يبات في القسم على حسب معارف الهانم .. هو بيحترم الفلوس وبيخاف من هزيمة أخرى .. عشان كده بيسيطر على نفسه .. أما البنت بتاعت العبآية دي غلبانة اخرها تصوت الناس هتتلم هيقولوا طيش شباب وخلاص مفيش عقاب مفيش هزيمة ... بالتالي إحساس بالقوى ولذة الإنتصار المريض
السايس اللي ممكن يعاكسك وانتي في الشارع عادي أصل إنتي كنتي لابسة ضيق وهو شاب ودي غريزة يعني وهو راكب موتوسيكل ده لو ماستعنش بالفنان عادل إمام وتامر حسني .. لكن وانتي بتركني كل أدب وعينه في الأرض ليه؟ عشان هتديله فلوس ساعتها يعرف يسيطر على نفسه حتى لو إنتي بالمايوه في العربية الخمسة جنيه بتوع الركنه أهم منك هيخلوه يسيطر على غريزته
دي اصفي معاني الجبن ... أنا جبان ومش محترم لدرجة إن الفلوس عندي مقدسة أكتر من البنت الإنسانة ... اخاف على أكل عيشي لكن لو في الشارع ومحدش هيعاقبني ... مخافش حتى على انسانية البنت دي ولا حتى من ربنا ولا أي حاجة
التحرش في وجهة نظري البسيطة هو نتاج من المبادئ دي .. لو عاوزين نعلاج مرض ... معالجة الظواهر مش فعالة .. معالجة السبب هو البداية وأحيانا البتر* بيكون حال للتفشي
لو كل ماسمعنا عن حالة اغتصاب سمعنا عن إعدام الفاعل وكل حالة معاكسة وتحرش قدامها سجن وغرامة وبهدلة ده اسمه بتر .. لو عندك سرطان البتر ممكن يكون قاسي بس هو حال للتفشي
*البتر : مقصود به بتر المشكلة ... زي حبس .. غرامة أو إعدام في حالة اغتصاب
