تيجي منغيرش حاجة في بعض؟

"تيجي منغيرش حاجة في بعض؟" قالتها رولا لأمير فجأة في وسط المكالمة. كانت من أوائل المكالمات ما بينهم, بعض ما صرحو بعض بإعجابهم لبعض. بعد شهور من أول مرة أتقابلو في فرح واحدة من أصحاب رولا, أمير كان صاحب العريس. بعد شهور من كلام علي الفايس بوك و الواتس أب و بعدين إكتشاف عشرات الأصحاب المشتركين بينهم, قررو أنهم معجبين ببعض. و طبعاً كأي أتنين في مصر و في السن ده قررو يشوفو ممكن يحصل إيه لو بقو مع بعض شوية و طبعاً الفترة اللي في الأول بتكون لطيفة خالص, مكالمات و ورد و خروجات شيك و اللي قلبك يحبه. كل ده أكيد بيتخلط بأمر الوقت و المجتمع لإرتباط بيسموه صحوبية أو علي رأي الترجمة "المواعدة". كانت جملة رولا دي في الفترة الكيوت اللي بنحكي فيها, لسه مفيش أي حاجة خالص. في أغلب الأحيان النهاية مش بتختلف عن حاجة من الأتنين, يا إما يتخطبو و الموضوع يقلب رسمي يا إما بيسيبو بعض و مابيعرفوش بعض تاني. أما رولا فكان لديها فكرة أخري و كانت بترمي بياضها تشوف أمير هيعمل إيه.

ضحك و رد عليها "لاء مش فاهم إزاي؟". هي خدت الضحكة كمفتاح لقبول مبدئ للنقاش و أسترسلت في كلامها "يعني كل واحد فينا ليه سلوكه الخاص بيه .. يكمل عادي و نشوف لما حياتنا تتقابل ببعض إيه اللي هيحصل؟". و كان في قدر من السكوت في إنتظار رد من أمير, فأجاب "كملي..". أبتسمت و هو كانه شاف الإبتسامة "من الأخر كل ما أتنين بيحبو بعض أو يعجبو ببعض أو يفكرو في الإرتباط, بيحولو يغيرو بعض .. ياإما بيلاقو حاجة مش عاجباهم فيحاولو يغيروها فا يفشلو و يزعلو أو يلاقو حاجة و يغيروها بس الي قدامهم يمثل التغيير من باب أنه مش عاوز يزعل اللي قدامه .. ولو متغيرش التاني برضه بيزعل". قرر أمير أخيراُ يتكلم "و أنتي مش عاوزانا نزعل من بعض؟". فردت رولا "الفكرة أن التوقعات و الطموحات هي اللي بتأدي لخيبة أمل و زعل .. التغيير كده كده هيحصل لو في إستمرار لكن مش علي حجم التوقع الخيالي اللي بيكون في دماغ الشخص التاني". كانت دي مكالمة غريبة علي أمير رغم أنه مر بالفترة دي مع أكتر من بنت لكن المرة دي شكلها مختلفة فقام رد "طب و ده هيكون في كل حاجة؟". رولا قالت تديله سيطرته "والله أنا بقترح, و أحب أسمع رأيك ..". ضحك أمير تاني و قالها بصوت ناعس "رأي تسمعيه بكرة عشان الساعة 12 و أنا عندي ميتنج بدري لازم أوصل أول واحد". و خلصت المكالمة علي كدة ..

و هو ده اللي بحصل فعلاً, هو إحنا ليه بنُعجب بحد و بعدين بنقرر نغير كل حاجة فيه؟ إحنا كدة بنُعجب بورقة فاضية علشان إحنا نلونها ولا إية؟ المشكلة عند الولاد و البنات علي فكرة. هتلاقيه بيقولها لاء ماتلبسيش كدة, لاء ماتكلميش ولاد, لاء ماتخرجيش مع البنت دي. أو أنا بحب اللي هتجوزها تبقي بيتسمع فيروز, البنت اللي في أحلامي بتتكسف من خيالها, خطبتي القديمة كانت بتاخد رأي في مشاكلها كلها. من ناحية تانية بتلاقي البنت يا إما تستني السربرايس بارتي مع السلسلة الدهب أو اليوم الوهمي بتاع السخنة اللي هو أكيد من ورا أهلها أصلاً. في بنات الحقيقة بتطلب, علي فكرة أنا بكره السجاير أو المفروض ماتكلمش بنات غيري.

و بعدين؟ هو أنتي ماشوفتيش السجاير قبل ما تُعجبي بيه؟ هو أنت ماشوفتش فستانها القصير قبل ما تتطلب تصاحبها؟ هو أنت متوقع أن هي ماكنش ليها أصحاب ولاد في الجامعة و زمايل ولاد في الشغل؟ هو أنتي ماشوفتيش أنه بيلبس جينز كل يوم من أول ما عرفتيه؟ أمال ليه بتقول معجب؟ ده غير الحاجات اللي بتظهر في النص! ده أصله طلع بخيل أوي أو يا ساتر ده تافهه بشكل عجيب. في برضه أصلها طلعت زنانة و نكادية و أنا عاوز واحدة فرفوشة في البيت.ماشي هي دي حاجات بنكتشفها بعد وقت من العلاقة و في الحالة دي عبر عن نفسك مرة و اتنين و لو مفيش فايدة .. أخلع أو أخلعي. بالسهولة دي تفتكرو؟ مش ساهلة أكيد بس لو متغيرش و أنت مش عارف تتقبل .. إيه الحل؟

و بليل تاني يوم كلمها و طلب منها تكمل كلامها علشان يديها رأيه. "بُص أنا بحب أكون نفسي و أكيد أي حد كدة, أنا هعمل كل اللي أنا بعمله عادي! هلبس و هتكلم و هخرج زي ما أهلي ربوني و علموني أحترم نفسي .. أي حاجة أنا بعملها و بتكسف منها مش المفروض أصلاُ أعملها لو أنا معاك أو مش معاك علشان أنا كده أبقي بكدب عليك و أكيد أنت كمان تعمل كل اللي أنت بتعمله". و رد أمير كان واضح و صريح "بس لو في حاجة مش قادرين نستحملها لازم تتغير". رولا "نتكلم فيها و أكيد هيبقي في تضحيات بسيطة علشان المركب تمشي و بعدين أكيد إحنا هنشرك بعض في حياتنا و هنبقي أولوية لأننا مع بعض ده طبيعي". و أمير لقي الموضوع ممكن يبقي في تجديد و مصلحة "أما نشوف الموضوع هيمشي إزاي". ضحكت رولا و ردت "ماشي"

يا ريت نتعلم من بعض و نستشير بعض بدل ما نحاول نغصب بعض علي التغيير بتوقعات خيالية و تحكمات صارمة. اللي مش عاوز يحترم نفسه مش هيحترمك و اللي مش عارف يقدرك أكيد مش عارف قيمتك, بس المهم تكون أنت عارف قيمتك. أطلب نصيحة و أسئل لو ده هيزعله منك أو لاء لو كنت شاكك. في الأخر اللي عاوز يحب حد هيعمل كل حاجة يقدر يعملها علشان يكونو مع بعض. كلنا فينا عيوب, المهم ندرك عيوبنا علشان نتغير. و في الأخر اللي بيتغير بيتغير علشان نفسه مش علشان حد تاني.